Apple កំពុង​ស្វែងរក​វិធី​បន្ថែម​ជម្រៅ​ដល់​រូបភាព 3D ដែល​ថត​ដោយ iPhone

    សំណើ​សុំ​ប៉ាតង់​ថ្មី​មួយ​កាលពី​ថ្ងៃ​អង្គារ​ម្សិលមិញ​ដោយ​ក្រុមហ៊ុន Apple បាន​បង្ហាញ​ថា ក្រុមហ៊ុន បច្ចេកវិទ្យា​យក្ស​មួយ​នេះ កំពុង​ស្វែងរក​លទ្ធភាព​បន្ថែម​ជម្រៅ​នៃ​រូបភាព ដែល​ថត​ដោយ​កាមេរ៉ា របស់ iPhone។ ប៉ាតង់​ថ្មី​នេះ​បាន​បង្ហាញ​ពី​របៀប​ចាប់​យក​រូបភាព Stereoscopic តាមរយៈ ផ្នែក​ទន់ ដោយ​មិន​តម្រូវ​ឲ្យ អ្នក​ថតរូប ចាំ​បាច់​ផ្លាស់ប្ដូរ​ឥរិយាបថ​ក្នុង​ការ​ថត​នោះ​ទេ។

  ប៉ាតង់​ក៏​បាន​បង្ហាញ​ពី​វិធី​ដែល​ផ្នែក​ទន់​អាច​សំគាល់ រូបភាព​ឌីជីថល 2 ហើយ​បញ្ចូល​វា​ជា​រូបភាព Steroscopic តែមួយ​ដើម្បី​បង្កើត​ជា​រូបភាព 3D។ បច្ចេកទេស Steroscopic ត្រូវ​បាន​គេ​យក​ទៅ​ប្រើ ដើម្បី​បង្ហាញ​រូបភាព ឬ​វីដេអូ បែប 3D បច្ចុប្បន្ន ដោយ​តម្រូវ​ឲ្យ​អ្នកថតរូប​ឬ​វីដេអូ​ប្រើ​កាមេរ៉ា ដែល​មាន​កាមេរ៉ា​ថត 2 ដើម្បី​ចាប់​យក​រូបភាព​ពីរ ដែល​លំអៀង​គ្នា​បន្តិច ក្នុង​ពេល​តែ​មួយ (ប្រៀប​ដូច កែវភ្នែក យើង​ទាំង​ពីរ ពេល​មើល វត្ថុ​អ្វី​មួយ) រួចមក ផ្តុំ​រូបភាព​នេះ ជា​រូបភាព​តែ​មួយ​ដើម្បី​បង្កើត​ជា រូបភាព​បែប 3D។

                                         រូបភាព 3D ដែល​បង្កើត​ដោយ​វិធី Stereoscopic

   តែ​សម្រាប់​ប៉ាតង់​ថ្មី​នេះ របស់ Apple មិន​តម្រូវ​ឲ្យ​ប្រើ​កាមេរ៉ា 2 នេះ​ទេ គឺ​ប្រើ​តែ​មួយ​ហើយ​ការងារ ផ្គុំ និង​ជ្រើសរើស​រូបភាព នឹង​ធ្វើ​ឡើង​ដោយ​ឧបករណ៍ (iPhone/iPad)៕